LAOAG CITY – Inrakurak ti kataengan nga head of state iti lubong a ni Cameroon President Paul Biya, agtawen ti 92, nga agpaidasig manen a para presidente intono Oktubre gapu ta gagem na a maiyalud-od pay ti 43 a tawen na iti turay.
Segun ken ni Biya, ti desisyon na nga agpaidasig para iti maikawalo a termino na ket gapu kadagiti panawagan dagiti tattao manipod iti amin a rehiyon iti Cameroon.
Sumangsango ti gobierno ni Biya kadagiti kritisismo gapu iti panagkunniber, panagkusit, dakes a panagturay ken pannakapaay a mangtaming kadagiti karit para iti seguridad.
Adda pay dagiti maseknan mainaig iti salun-at ken abilidad ni Biya nga agturay iti Cameroon.
Maipalagip a ti saan a panagpakita ni Biya iti publiko iti nasurok nga innem a lawas iti napalabas a tawen ket nangitunda ti ispekulasyon maipanggep iti kaadda ti problema iti salun-at na ken adda pay dagiti nagwaras a damag a pimmusayen daytoy.
Ni Biya ket saan pay a pulos a naabak kadagiti naisayangkat nga eleksyon sipud nagturay idi 1982 ken no mangabak manen para iti maikawalo a termino na ket isuna ti agserbi a presidente agingga a madanun na ti tawenna a 100.
