LAOAG CITY – Nagselebrar ti kataengan nga orangutan iti intero a lubong a ni Bella iti maika-63 a panagkasangayna.
Pinasingkedan ti Guinness World Records a ti Sumatran orangutan a ni Bella ket isu ti “Oldest Orangutan in Captivity” iti tawenna nga 63.
Natiliw ni Bella iti kabakiran idi 1964 ket naipan iti Hagenbeck Zoo idiay Hamburg, Alemania. Manipud idin, nagnaed daytoy iti nasao a lugar agingga ita. Mapattapatta a naipasngay ni Bella idi 1961.
Tapno marambakan ti birthday-na, naisaganaan ni Bella iti birthday cake a naaramid iti soft-boiled rice nga addaan iti nagdumaduma a prutas no kinnanna daytoy a kaduana ti maysa kadagiti inamponna nga annak a ni Berani.
Adu ti maay-ayo iti napaut a panagbiag ni Bella gapu ta ti gagangay a panagbiag ti orangutan ket 40 agingga 50 laeng a tawen. Nagun-od ni Bella ti titulona iti Guinness World Record idi 2021 idi pimmusay ni Inji, maysa a kataengan nga orangutan iti Oregon Zoo idiay Estados Unidos.
Segun kadagiti guardia ni Bella, naasi, nasaririt ken saan a pulos nga agresibo. Naawagan daytoy iti “supermom” idiay Hegenbeck Zoo gapu ta malaksid iti panangipasngayna iti innem nga annak, inasikasona ti uppat a maladaga nga orangutan a binaybay-an dagiti innada.
Gapu ta baketen ni Bella ken sumagmamano laeng ti ngipenna, ti paboritona a taraon ket lugaw a naaramid iti semolina.
