LAOAG CITY – Nangiyuswat dagiti miembro ti Romano Katolika ken dagiti amin nga agkalkalap ti prosisyon iti Brgy. Lapaz ditoy ciudad ti Laoag.
Segun kenni Mr Ricardo Bindara, tinawen da nga iyus-uswat ti prosisyon kas panagyaman kenni Virgin Mary iti panangted na iti lames ti baybay.
Malaksid iti daytoy, kuna ni Bindara nga adda ti insagot da a sibibiag a manok, diket ken itlog kas panangdawat pay ti ad-ado a lames a pagbiagan dagiti residente iti nasao a lugar.
Naamoan a ti insagot da a manok ket naipan iti styro foam ken kawayan ken inpan da iti tengnga ti baybay.
Inbatad ni Mr. Rick Bindara nga umabot ti 300 a tattao dagiti nagatendar iti prosisyon.
Daytoy ket kageddan ti pannaka-instolar ni Father Greg kas Parish priest iti Brgy. Lapaz ditoy ciudad ti Laoag.
Inbatad na a maysa kadagiti gagem ti prosisyon ket tapno dumawat ti ad-ado wenno naan-anay a pagbiagan kangrunaan ti maala da a lames.
Kunana a nadlaw na a bumasbassit dagiti makalapan da isut gapo na a masapol laeng ti panagkarkararag tapno umado makalapan da a lames iti baybay.
