LAOAG CITY – Nasursurok ngem sangapulo a milyon a pisos ti balor dagiti naipaay a tulong kadagiti mannalon, mangngalap ken livestock raisers ita a malem iti babaen ti Agri Ka Dito Program ti gobierno probinsial.
Segun ken ni Gob. Matthew Marcos Manotoc karaman kadagiti benepisiario dagiti innem a pulo a taga ditoy siudad ti Laoag, sanga gasut siyam a pulo ket tallo manipud iti siudad ti Batac, taga Vintar, Pagudpud, Sarrat, Vintar ken Dingras.
Inbunannagna a dagiti naibunong kadagiti benepisiario ket dagiti nakiddaw iti babaen ti nadakamat a programa ti gobierno probinsial kas iti siyam a pulo ket maysa a knapsack sprayer, sangaribu tallo gasut limapulo ket tallo a sako ti organic nga abono, sangaribu tallo gasut limapulo ket tallo a foliar fertilizer, nadumaduma a bin-i a bukbukel ti natnateng, walopulo ket walo a burias, walopulo ket walo a sako ti feeds ken supplements para kadagiti taraken.
Inpadanon ti gobernador ti panangnamnamana a makatulong dagiti inpaay ti gobierno probinsial. Impatalgedna ti panangtutuk ti gobierno probinsial kadagiti “long-term” ken daddadakkel a solusyon kadagiti parikut dagiti mannalon, mangngalap ken dagiti livestock raisers ditoy probinsia.
Kagiddan daytoy, ginutigot manen ni Gob. Manotoc dagiti mannalon nga agmula iti High Value Crops agsipud ta nalaka ti presyo ti irik idinto a nangingina ti presyo dagiti kasapulan iti panagtalon.
Kunana a daytoy ti rason nga ar-aramiden ti gobierno probinsial ti amin a kabaelanna tapno maipaay dagiti kasapulan dagiti mannalon.
Inpanamnama pay ti gobernador nga ikarkarigatan ti gobierno probinsial a masolusyonan ti nabayagen a problema iti irigasyon ken iti pannakailako iti nasayaat a presyo kadagiti produkto ditoy probinsia.
Mangnamnama a makatulong iti daytoy a problema ti pannakaiyestablisar ti cold storage facilities, pannakaisayangkat ti product processing ken ti agri-business.
