LAOAG CITY – Inyistorya ni Atty. Anthony Mark Emocling manipud iti Baguio City ti kapadasan na manipud panagbasa na ti abogasya agingga a nakapasa iti kaliplippas laeng a 2022 Bar Examination.
Ni Atty. Emocling ti kaunaan iti pakasaritaan ti Bar Examination a nakaspasa a maysa a visually impaired.
Segun kenni Emocling, doble ti rigat na iti panagbasa, apangreview agingga iti panageksamin na gapo iti kasasaad na no sadinno ket adda pay ti gundaway idi nga arig na ket maawananen ti namnama.
Kunana a sipud pay idi ubing ket arapaap nan ti agbalin nga abogado.
Inbatad ni Emocling a bayat ti eksaminasyon ket adda ti inpaay kenkuana ti Korte Suprema tapno isu ti mangbasa iti saludsod ken isu ti mang-encode ti sungbat nga ibaga na.
Inlawlawag na a bayat nga ur-urayen na ti resulta ti eksaminasyon ket arig na marikrikna na a makapasa ken isu ti namnamaen na ngem adda latta idi dagiti negatibo a mapanpanunot na.
Mainaig iti daytoy, kalikagom na ni Atty. Emocling nga agtrabaho iti Commission on Human Rights ken agserbi iti publiko kangrunaan na kadagiti addaan ti rangkap iti bagi.
