LAOAG CITY – Maiyuswat ti kaunaan a debate da dati nga US President Donald Trump ken ni Vice President Kamala Harris intono Setyembre 10 para iti US Presidential Election a maangay intono Nobyembre ita a tawen.
Immuna iti daytoy, kinarit ni Trump ti democratic rival na ti panagdebate da iti mamin-ado a daras sakbay ti November election.
Mainaig iti daytoy, kinumpirmaran ni Harris nga agatendar iti debate da ken ni Trump intono Setyembre 10.
Maipalagip nga immunan a nag-debate da Trump ken ni US President Joe Biden idi Hunyo, ken sumaruno koma a debate da intono Setyembre 10 ngem insanud ni Biden ti kandidatura na idi Hulyo 21 ita a tawen.
Kabayatanna, binabalaw ni Trump ni Harris gapu iti saanna a panangipatpatungpal ti news conference wenno interview sipud napili kas Democratic nominee.
Naamoan a ni Trump ket ado dagiti nakalinya a conference na iti nagduduma nga estado idiay Amerika.
