LAOAG CITY – Balligi a naiyawat ti kaunaan a Jobstart Philippines Program ditoy Ilocos Norte iti panagkammayet ti Provincial Government of Ilocos Norte (PGIN) ken ti Department of Labor and Employment no sadinno a naawaten dagiti benepisiario ti stipend da.
Segun iti Gobierno probinsial, agdagup ti 4,150 a pisos ti naited iti tunggal maysa kadagiti 50 a benepisiario ti nasao a programa.
Indauloan a mismo ti gobierno probinsial pakairamanan dagiti agpapaay iti DOLE ti pannakaipaay ti stipend dagitoy iti auditorium ti kapitolio probinsial.
Kagiddan daytoy, impadanon ti gobierno probinsyal ti panagyamanna kadagiti “employers” a nakibinnulig iti nasao a programa.
Immun-una ngem iti daytoy, inlawlawag ni Mrs. Anne Marie Lizette B. Atuan, PESO Manager ti PGIN a dagiti benepisiario ti jobstart ket dimmalan nga immuna iti “career coaching” iti uneg ti 10 nga aldaw a “life skills training program”.
