LAOAG CITY – Inpannakkel ti Armed Forces of the Philippines (AFP) ti tumibtibker nga alyansa ti Pilipinas ken Amerika iti babaen ti panqgbibinulig ken kooperasyon iti panangdepensa ti dua a pagilyan.
Segun ken ni Armed Forces of the Philippines Chief of Staff, General Romeo Brawner Jr. daytoy ket kalpasan a naisayangkat ti maikalima a Maritime Cooperative Activity (MCA) iti nagbaetan ti Pilipinas ken Amerika ken maibilang daytoy kas kaunaan a Maritime Exercise ita a tawen 2025.
Naiwayat iti nasao a Maritime Activity idiay Palawan kadwa da ti United States Indo Pacific Command (USINDOPACOM).
Nausar iti panagsanay dagiti asset ti Pilipinas a pakairamanan ti BRP Antonio Luna (FF151), BRP Andres Bonifacio (PS17), dua a FA50 fighter aircraft, ken dagiti asset ti Philippine Air Force para iti Search and Rescue (SAR).
Kabayatanna, sumagmamano kadagiti naisayangkat a training ket ti Communications Check Exercise (COMMEX), Division Tactics / Officer of the Watch (DIVTACS/OOW) maneuver, Photo Exercise (PHOTOEX), ken Dissimilar Aircraft Combat Training (DACT).
