LAOAG CITY – Inpakaammo ni Sangguniang Bayan Member ken Committee on Peace and Order Chairman Marvin Pascua iti ili ti Solsona nga adda ti maiyuswat a liga ti basketball iti nasao nga ili.
Kuna ni Pascua a daytoy ket ti umuna a Mayor’s Cup basketball tournament ken mangrugi intuno Setiembre 17 babaen iti tema a “Basketball laban sa iligal na Droga.”
Inbatad ni Pascua a babaen iti nasao a liga ket mapadur-as ti nagduduma nga skills iti basketball.
Innayun na a daytoy ket wagas tapno maaddaan ti ideya ken self-discipline dagiti tattao kangrunaan dagiti agtutubo.
Immuna iti daytoy, inpakaammo ni Pascua nga iti liga ket manamnama nga agkakabalubal ti 18 a teams.
Kuna na a karaman ditoy dagiti team manipod iti Philippines Army, bukod a team ti sumagmamano nga opisyal ti Solsona pakairamanan ti team ti INPPO nga idadauloan ni provincial director PLt. Col. Julius Suriben kasta pay dagiti aggapo iti non-government organizations.
