LAOAG CITY – Kinumpirmaran ni Doctor Renato Mateo iti City Health Office (CHO) nga addan ti nairekord da nga umuna a Person Under Investigation (PUI) gapu iti covid-19 ditoy ciudad ti Laoag.
Inbatad ni Mateo a Person Under Monitoring (PUM) ti immuna a klasipikasyon ti maseknan gapu ta uyek, sore throat ken gurigor laeng ti paspasaren na.
Nupay kasta, kalpasan ti sumagmamano nga aldaw ket marigatan daytoy nga umanges isut gapuna nga inpan da iti Mariano Marcos Memorial Hospital and Medical Center iti ciudad ti Batac.
Segun ken ni Mateo, ti PUI ket taga Barangay Bacsil ditoy ciudad ti Laoag, maysa a lalaki ken awan ti travel history na.
Innayon na a nabalakadan da metten dagiti kabagyan ti PUI a nakapulpulapol na nga ag-home quarantine da.
Iti agdama, kuna ni Mateo nga adda iti stable a kondisyon ti PUI.
