LAOAG CITY – Natay ti maysa a residente iti Honolulu gapu ti coronavirus pandemic ken daytoy ti kaunaan a nairecord ti Hawaii Department of Health.
Iti report ni Bombo International News Correspondent Manny Pascua iti Hawaii, ti biktima ket awanan ti travel history.
Naduktalan dagiti doktor a nagpositibo ti biktima iti COVID-19 idi Lunes.
Naamuan ni Pascua a pimmusay ti biktima gapu ti nasao a virus ken dinegdegan dagiti immunan a sakit ti maseknan.
Kabayatanna, naimaldit ti 14 a baro a kaso ti coronavirus ti Hawaii Department of Health rason nga umaboten ti 90 dagiti kaso ti COVID-19 ti pakadagupan ti nairekord.
Kuna ni Pascua a mangrugi ti lockdown iti intero nga Hawaii intono alas dose iti tengnga ti rabii aldaw ti Miyerkules iti nasao a lugar babaen ti pammilin ni Governor David Ige.
Innayon na a mapalubusan laeng a rumwar ket dagiti tattao nga agtrabaho.
