Nairekord ti Department of Health ti kaunaan a pimmusay nga adda ti pakainaiganna iti panagusar ti vape.
Kinumpirmaran ni Health Assistant Secretary Albert Domingo a maysa nga agtawen ti 22 a lalaki ti natay gapu iti heart attack a sinaruno ti severe lung injury gapu iti inaldaw a panagusarna ti vape iti uneg ti dua a tawen.
Ti nasao a biktima ket awan ti comorbidities idi naitaray iti emergency room idi 2023.
Daytoy ket maibasar iti naisayangkat a research study a naipablaak iti Respirology case reports journal ti Asian Pacific Society of Respirology ni Dr. Margarita Isabel Fernandez ken sumagmamano a doktor ti Philippine General Hospital.
Basar pay iti panagsukisok, naaddaan ti dua nga aldaw nga history ti sudden onset severe chest pain ti biktima kalpasan ti sports activity. Nakapasar pay daytoy iti makalawas nga history ti productive cough, hemoptysis, fever ken vomiting.
Inbatad met ni ASec. Domingo a nasullatan dagiti 2 nga arteries ti puso ti biktima.
Nailanad iti panagadal a naglikudan ti biktima nga addaan daytoy ti history ti cigarette smoking, alcohol intake wenno illicit drug use. Awan pay ti prior infection ti pasiente iti COVID-19.
Mainaig iti daytoy, nagballaag ti Department of Health official a ngumatngato ti peggad ti acute myocardial infarction ken stroke gapu iti panagusar ti e-cigarettes.
Kas sungbat, target ti Department of Health nga ingato ti legal age ti agus-usar ti vape manipod iti 18 agingga 21 iti babaen iti pannakaamendar ti Vape Law ken panagbalin a linteg ti Tobacco Illicit Trade Bill maiyallubog iti WHO Framework Convention on Tobacco Control (WHO FCTC) standards.
