LAOAG CITY – Manamnama a maiyuswat ti kaunaan a Pride Parade ditoy Ilocos Norte inton Hunio 29.
Daytoy ti inpakaammo ni Mrs. Janet London, ti mangidadaulo iti Gender and Development Office.
Segun kenkuana, nagduduma nga aktibidad ti maiyuswat para kadagiti Lesbian, Gay, Bisexual, Transgender and Queer wenno LGBTQ Community kas paset iti pannakaselebrar iti Pride Month.
Inbatadna a malaksid ti panagparada ket adda pay ti maipatakder wenno maipan a booth iti sango ti Ilocos Norte Centennial Arena para iti Human Immunodeficiency Virus screening a maipaay kadagiti kameng ti LGBTQ ngem saan daytoy nga inkapilitan.
Kunana nga adda pay ti maangay a search wenno panagbibinnalubal dagiti muse iti kada munisipalid ngem sangapulo laeng ti makastrek iti finale ken mabalin a mangabak iti titulo a Miss LGBTQ 2024 ken pakairamanan ti Best Costume.
Inpalgakna a mangrugi ti parada iti oras ti ala una ti malem iti Centennial Arena agingga iti sangoanan ti Kapitolio Probinsial.
Naammoan a manamnama a makipaset iti nasao nga aktibidad dagiti Mayor, dagiti kameng ti Sangguniang Panlalawigan ken dadduma pay a bisita.
Innayonna a ti nasao nga aktibidad ket mangted ti gundaway para kadagiti LGBTQ nga ipakita dagiti karbenganda gapu ta dakkel ti maitulongda iti panagdur-as ti ekonomia.
