LAOAG CITY – Nagselebrar idi Mayo 4 ti kaunaan a surviving nonuplets iti intero a lubong ti maikatlo a tawen a panagkasangayda iti Timbuktu, Mali idiay West Africa.
Idi 2020, naammoan ni Halima Cisse a ti sikogna ket maysa a kaso ti multiple pregnancy. Segun iti doktorna, mabalin a pito a maladaga ti adda iti sikogna. Idi madamag daytoy ti Presidenteda a ni Bah Ndaw, nangipaay daytoy ti tulong ken inpatulodna ni Halima ken ti asawana idiay Morocco tapno agpasngay iti nasao a pagilian ken matagiben dagiti espesyalista.
Apaman a nadanon ti Mayo 4, 2021, naisapsapa a nagpasngay ni Halima ken ti namnamaen a pito a maladaga ket nanayunan pay ti dua. Dagiti maladaga ket agdagsen ti 500 a gramo agingga 1 a kilo. Lima kadagitoy ket babbai ken dagiti uppat met ket lallaki. Gapu ta 30 weeks premature dagitoy, adu ti nangipagarup a sumagmamano kadagitoy ket saanen a makalasat pay.
Kalpasan ti 19 a bulan, nagbalin a nasalun-at dagiti siam a maladaga. Pinanagananda dagitoy ti Fatouma, Kadidia, Hawa, Adama, Oumou, Bah, Mohammed, Oumar ken Elhadji.
Idi inikkandan ti clearance dagiti maladaga, inyawiddan dagitoy iti pagilianda idiay Mali ket ditoy a sinabat isuda dagiti kakailianda no sadino ibilang kas maysa a milagro dagiti nonuplets.
Naisangsangayan ti nonuplets ken sakbay a naipasngay dagiti Cisse children, awan pay ti nairekod a kaso ti nonuplets a kumpleto a nabiag kalpasan ti sumagmamano nga oras ti pannakaiyanakda.
Gapu iti daytoy, pinadayawan ti Guinness World Records dagitoy kas “Most Children Delivered at a single Birth to Survive.”
