LAOAG CITY – Manamnama iti pannakaipatakder ti Swine Industry Recovery Project component 2 iti paset ti Brgy. Camangaan ditoy ciudad ti Laoag.
Segun kenni Dr. Jayvee Bryan Carillo, ti Center director iti Agriculture Training Institute, daytoy ti kaunaan a pasilidad a maipatakder ditoy Ilocos Norte ken maikatlo pay laeng iti intero a pagilian.
Kunana a ti nasao a proyekto ket nagbinnuligan ti Agricultural Training Institute Regional Training 1 ken t gobierno lokal ditoy ciudad ti Laoag.
Innayon na a ti proyekto a naiyalokaran ti 1.5-milyon a pisos ket agserbi kas fattening ken breeding station.
Patien ti gobierno lokal ditoy ciudad a babaen iti nasao a proyekto ket makatulong para iti al-alisto a panagrekobre ti ciudad anipod iti epekto ti African Swine Fever ken tapno maipasigurado nga adda ti umdas a supply a karne ti baboy a maidiaya kadagiti consumers ditoy ciudad.
