LAOAG CITY – Naragsak nga inpakaammo ni Presidente Ferdinand Bongbong Marcos Jr. a nainagunararan ti kaunaan a Tourist Rest Area iti intero a Luzon iti iti ili ti Pagudpud, Ilocos Norte.
Segun kenkuana, masarakan daytoy iti paset Brgy. Saud iti nasao nga ili tapno ad-adda pay a magutigot dagiti turista ken gangganaet a bumisita ditoy probinsia.
Inbatadna a malaksid iti daytoy ket adda pay ti dadduma pay a tourist attractions kas kadagiti Kabigan Falls, Patapat Viaduct, Blue Lagoon, Bantay Abot Cave, Sabang Beach, Dos Hermanos Island, Pannzian River ken Farm Tour.
Inlawlawagna a sakbay a madanon dagiti nasao a tourist destination ket malabsan pay ti Bangui Windmills ken Kapurpurawan Rock Formation iti ili ti Bangui ken Burgos.
Kunana a ti tuktok ti nasao a 2-storey building ket naaramid babaen iti anahaw a maysa a traditional material ditoy Ilocos Norte ken mangsalaknib iti nabara unay a panawen.
Mainaig iti daytoy, inpannakel ni Presidente Marcos a dagiti produkto ditoy probinsia a maididiaya ket mabirukan laeng ditoy gapu ta aramid daytoy dagiti local producers.
Dinakamatna nga adda pay ti Pasalubong Center a pakasarakan dagiti souvenirs, local products ken delicacies kas ti mushroom chips, bagnet chips, virgin coconut oil ken dadduma pay.
Innayonna nga adda pay ti maidiaya a local weave products wenno naaramid iti abel kas dagiti bag, blanket ken table runners.
Maipalagip a ti Saud Beach Resort ket maysa kadagiti 25 a napadayawan kas Most Beautiful Beaches in the World.
Kabayatanna, kuna ni Department of Tourism Secretary Christina Garcia-Frasco a babaen iti daytoy a proyekto ket ad-adda pay nga agbiag ken dumur-as iti benneg ti ekonomia ditoy Ilocos Norte.
