LAOAG CITY – Maragsakan ti Public Employment Service Office ti lokal a gobierno ditoy ciudad ti Laoag iti panakaisayangkat ti kaunaan a TUPAD Orientation.
Segun kenni Ms. Shey Pia Abaya, ti mangidadaulo iti Public Employment Service Office ditoy ciudad, maibilang daytoy kas maysa a milestone moment sipod nabukel iti PESO Laoag idi 2024.
Kunana nga adda ti pakabuklan a 349 a residente ditoy ciudad ti mabenepisyaran iti daytoy no sadinno a maikkan da ti trabaho iti las-ud ti 20 aldaw.
Innayon na a dagiti benepisario ket mannalon ken basurero iti sanitary landfill.
Inpakaammo na pay nga agsweldo dagitoy iti P505 a pisos iti kada aldaw wenno pakabuklan a 10,100 a pisos a sweldo iti uneg ti 20 nga aldaw
Kabayatan ti orientation ket ditoy a nailawlawag dagiti trabaho ken aramiden iti barangay da.
Kuna ni Abaya a maipannakel na iti PESO Laoag Team gapo iti dedikasyon da ken panagkaykaysa tapno agballigi dagitoy iti aniaman nga ipatungpal da a ganuat.
Inbatad na a ti kangrunaan a pagyamanan ti TUPAD Focal, ket ti agdama a Labor and Employment Assistant a ni Mr. Kevin Cesar Simon, a nangidaulo ti proseso ti aktibidad manipod briefing ken profiling dagiti benepisyaryo agingga iti pannakaisayangkat ti orientation, kasta pay ti Department of Labor and Employment, City Agriculture Office ken dadduma pay.
Kabayatanna, inpanamnama ti gobierno lokal a kadagiti sumarsaruno a pannakaiwayat ti TUPAD orientation ket aggapon to metten iti nagduduma a sektor dagiti agbalin a benepisyaryo.
