LAOAG CITY – Manamnama a maipasdek iti kaunaan nga Ilocos Norte Agricultural Trading Center iti siudad ti Batac.
Daytoy ket kalpasan a naipasa iti maika-dua ken maudi a pannakaibasa iti Draft Provincial Resolution No. 2024-10-350, maysa a resolusyon nga agpinnirma ti usufruct agreement iti nagbaetan ti gobierno probinsial ken lokal a gobierno ti siudad ti Batac.
Segun ken ni Sangguniang Panlalawigan Member Franklin Respicio, chairman ti Committee on Laws, daytoy a katulagan ket mangipasimudaag ti panangipalubos ti lokal a gobierno nga usaren ti Provincial Government of Ilocos Norte ti paset ti daga kas donasion a pakaipasdekan ti Ilocos Norte Agricultural Trading Center.
Kinuna ni Atty. Juan Alfonso Augustus I. Jose, mangidadaulo ti Ilocos Norte Agriculture and Fisheries Extension Center (INAFEC), daytoy ket maiyannatop iti nagbalin a kiddaw ni Gov. Matthew Marcos Monotoc iti Department of Agriculture para iti pannakaestablisar ti trading center ditoy probisia no sadinno a nangipaay ti P30-M para iti daytoy.
Innayonna nga iti agdama ket agarup 30% ti estruktura ti nalpasen a masarakan iti asideg ti merkado publiko ti nadakamat a siudad.
Mainaig iti daytoy, kalikagumda kunana pay a kalikagum ti mangiwayat iti benchmarking kadagiti dadduma a probinsia nga addaan iti trading centers tapno adda ideyada no kasano ti pannakapataray ti nasao a pasilidad.
Kabayatanna, ti trading center ket agbalinto a sentro ti komersio, a ditoy a mabalin a mailako ken magatang dagiti nagduduma a produkto manipud iti nagduduma a lugar iti retail ken wholesale.
