LAOAG CITY – Nakadanunen ditoy Probinsya ti Ilocos Norte ti kaunaan nga indibidual nga addaan ti iggem ti Guiness World Record gapu iti panagsursor na iti intero a lubong babaen iti human power wenno bukod na a pigsa.
Daytoy ket ni Erden Eruc, agtawen ti 61 ken naggapo iti Washington, United States of America.
Simmangpet ni Eruc ditoy probinsya usar ti bisikleta na ken naggapo daytoy idiay Legazpi, Albay nga isu ti immuna a nakadanunan da ditoy Pilipinas idi Marso 2022 manipod naggapo idiay Hawaii.
Iti eksklusibo nga innuman ti Bombo Radyo Laoag ken ni Eruc, kuna na a nangrugi ti panagsursor na iti intero a lubong idi 2012 idiay Califronia, USA.
Kuna na a kalpasan a pimmusay ti pagayam na gapu iti rock climbing ket dita a naamiris na nga ababa laeng ti biag rason a naaddaan ti inspirasyon tapno agpasyar iti intero a lubong babaen iti bukod na a pigsa.
Immuna iti daytoy, inbatad ni Eruc a nangrugi ti panagbiyahe na manipod Legazpi, Albay idi Enero 18 ken simmangpet idi kalman, Enero 29 ditoy Ilocos Norte.
Nagtalalinaed ni Eruc iti maysa a resot iti ili ti Currimao babaen iti tulong ni Mayor Boyet Quilala ken manamnama nga agsubli daytoy iti Legazpi tapno alaen ti bangka nga usaren na iti sumaruno a biyahe na.
Kalpasan ditoy probinsya nga isu ti maudi a destinasyon ni Eruc ket gandat na ti agturong idiay Vietnam ken Portugal usar ti bangka na sakbay nga agsubli idiay California, USA.
