LAOAG CITY – Pormalen a nagtugaw kas baro a Prime Minister ti United Kingdom ni Labour leader Keir Starmer kalpasan a dinutukan ni King Charles III idiay Britain.
Iti masungad iti panagbitlana kas Prime Minister iti No 10 Downing Street idiay London, nagyaman ni Starmer iti outgoing Prime Minister Rishi Sunak a kaunaan a nagbalin a British Asian Prime Minister ken dinayawna dagiti balligi, dedikasion ken sakripisio daytoy iti babaen ti panangidaulona.
Inkari met ni Starmer nga isublina ti talek dagiti umili iti gobierno iti babaen ti lideratona iti baet ti biddot a pammati dagiti naruaya a tattao maipapan iti pulitika.
Inbatadna a nalawag a makasapol ti pagilianda ti “bigger reset’ ken nagkari ti national renewal.
Immuna iti daytoy, nagturong ni Starmer iti Buckingham Palace no sadino nakasaritana ni King Charles III ken pormal a nabilin a mangbukel ti maysa a gobierno.
Kabayatanna, sumurok maysa nga oras sakbay ti panagbitla ni Starmer, nangipaay pay ti resignation address ni outgoing British Prime Minister Rishi Sunak iti No 10 Downing street kalpasan a naan-anayen a bimmaba iti puesto kalpasan a naabak iti kaliplippas a general election.
Kunana a daytoy ket maysa a narigat nga aldaw ngem ibatina ti trabahona nga addaan ti dayaw kas Prime Minister iti maysa kadagiti kabilegan a pagilian iti intero a lubong.
Maipalagip nga immunan a nag-concede wenno inawat ni Sunak ti pannakaatiwna idi Biernes iti kaliplippas a general election.
Innayon ni Sunak a gagemna ti amin a pagsayaatan para iti sumukat kenkuana ken inadmitirna met dagiti biddotna kabayatan ti panangidaulona.
Kabayatanna, nagserbi kas Punong Ministro ng Britaniya ang Conservative Prime Minister manipud idi Oktubre 2022 agingga ita nga Hulio 2024.
