LAOAG CITY – Inrakurak ni Kenyan President William Ruto a mangipatakder ti simbaan iti presidential residence iti Nairobi no sadinno a ti magastos ket aggapo a mismo iti bulsa na isut gapuna a saan a rumbeng nga agpadespensar iti aramiden na.

Inpetteng na a mabalin a ti demonyo ket makapungtot ken aramiden na ti kayatna.

Ti nagbalin a rakurak ni Ruto ti nagpungtotan dagiti Kenyans a siguden a naupay iti estilo ti panangidaulo na ken ibilang da a pangriribok iti estado ken simbaan.

Saan met a nalawag no siasinno ti dakdakamaten ni Presidente Ruto a demonyo iti rakurak na iti State House, ngem inpetteng na nga awan ti makalapped iti proyekto na.

Immuna iti daytoy, adda ti naipublikar nga architectural designs a pakakitaan ti dakkel a pasdek nga addaan ti  stained glass a tawa ken kabaelan na nga akomodarren ti 8 ribo a tattao.

Ado dagiti mangkritikiar iti possible a magastos iti proyekto ni Ruto a mapatta-patta nga umabot iti $9m iti panawen a kaadoan dagiti Kenyans ket agrigrigat gapu iti uad-ado a gastos iti panagbiag.