LAOAG CITY – Nagkedkedan ti International Criminal Court (ICC) ti kalikagum ti kampo ni dati a Presidente Rodrigo Duterte a maaddaan ti access kadagiti pribado a komunikasion iti nagbaetan ti Registry ti Korte ken kadagiti independent medical experts a mangkitkita no kabaelanna a sumango iti panangtingiting.
Iti lima a panid a desision nga addaan ti petsa a Disiembre 23, 2026, inbatad ti International Criminal Court Pre-Trial Chamber I a saan a na-justify ti depensa ti kasapulan iti “urgent” disclosure.
Immunan a kiniddaw ti kampo ni Duterte iti korte a bilinen ti Registry nga ited amin dagiti email, surat ken datos dagiti panagsinnarita iti telepono pakairamanan ti medical panel.
Kuna ti depensa a napateg ti impormasion tapno maarisit no kasano nga ipapaay ti pammilin ti korte ken no ania dagiti dokumento nga inted pakairamanan ti medical record ni Duterte tapno ipadalan iti panangtingiting.
Nupay kasta, inpetteng ti Chamber nga idadauluan ni Judge Julia Motoc a ti Registry ket maysa a “neutral organ” ti korte a ti papel ket makikoordinar kadagiti eksperto tapno maipatulod dagiti ibilbilin daytoy.
Kuna pay ti korte a ti depensa ket addaanen kadagiti amin a kasapulan nga impormasion tapno isagana dagiti naobserbaranda.
Maipalagip a naarestar ni Duterte idi Marso 2025 ken manarimaan a nakabalud iti International Criminal Court detention center idiay The Hague tapno sangoen dagiti kaso nga adda ti pakainaganna iti krimen partikular iti war on drugs.
