LAOAG CITY – Napalaos ti panagyaman ti host a ni Kim Atienza kalpasan a nakalasat daytoy iti napasamak a desgrasia.
Inbatadna a daytoyen ti maikapat a gundaway a nakalasat isuna iti desgrasia.
Inlawlawagna a kabayatan a nakalugan iti motorsiklona ket kellaat a bimmallasiw iti sangoanan ti dakkel nga aso.
Gapu iti daytoy, naipurwak isuna agingga iti walo a kadapan ken arig nakangngeg isuna nga adda ti naguni iti tulangna.
Maibilang a milagro a sarsarunnoen isuna ti Fire Emergency Paramedic Assistance group (FEPAG) EMS PHILS ken nakita ti desgrasia isu a dagitoy iti nangitaray kenkuana iti ospital.
Naammoan nga adda ti natukkol iti paset ti paragpagna ken awan ti naapektaran iti sabali a paset ti bagina.
Gapu iti aksidente ket saan pay laeng a makatrabaho isuna ken makalugan ti motorsiklo.
Napalaos ti panagyamanna iti Dios idinto a nangipadanon ti alisto a panagimbagna dagiti fans ken dagiti kakaduana iti trabaho.
