LAOAG CITY – Inbatad ni Dr. Loida Valenzuela, ti provincial veterinarian ditoy Ilocos Norte nga in-inot ti panagsubli ti suplay ti karne ti baboy ditoy probinsya.
Daytoy ket kageddan ti in-inot a pannakaipalubos nga agtaraken ti baboy dagiti hog raisers ditoy probinsya.
Nu pay kasta, inlawlawag ni Valenzuela a limitado pay laeng ti suplay ken karaman kadagiti mailaklako iti merkado ket ti frozen meat.
Inbatad na a nu maipanggep kadagiti produkto a maaramid manipod iti karne ti baboy ket adda metten ti produksyon partikular iti bagnet ken longganisa.
Mainaig iti daytoy, kuna ni Valenzuela basar iti obserbasyon da ket arig a kimmapsot ti konsumo ti publiko iti karne ti baboy.
Inbunannag na a daytoy ket posible nga epekto ti nakaro a panagngato ti presyo gubuay ti bassit a suplay ti maparti a baboy.
Kabayatanna, nagpalagip ti provincial veterinarian kadagiti aglaklako ti frozen meat a pagtalinaed nga adda iti freezer dagiti karne kas panangsurot ti administrative order ti national meat inspection service.
Innayun na a kadagiti met aglaklako ti naparti a baboy, saan a gundawayan ti limitado pay laeng a suplay tapno nalabes ti panangipangato ti presyo.
