LAOAG CITY – Inlawlawag ni Mrs. Leona Salvador, a nagangawan ti anak na iti agpakamatay.
Daytoy met mainaig iti maipagarup a panagpakamatay ti anak na a ni Louie Salvador iti Brgy. 55 Vira ditoy siudad ti Laoag.
Kuna na a nabartek idi napasamak ti insidente no sadino a maipagarup nga iputipot na ti tali iti tenged na.
Segun kenni Mrs. Salvador, nakita na ti anak na a nakaparintumeng kalpasan a nakaangot iti naangseg idi nakasangpet manipud iti simbaan idi kalman ti malem.
Inlawlawag na a sakbay a pimmanaw a mapan iti simbaan ket napan ti anak na kadagiti barkada ken nagiinom da.
Kuna na nga idi intulnog ti maysa kadagiti kadua na iti pagtaengan ket saan a napnek ti biktima ken napan nagsapul ti inumen na.
Inbunannag ni Salvador nga inkiddaw ti biktima iti kasinsinna nga iyalaan na barot.
Inbatad na nga awan met iti problema iti pamilya da ngem adda ti maysa a putot ti anak na iti dati nga asawa na ken adda iti kinalive-in na.
Innayon ni Salvador a maipagarup a nagduduma a lallaki ti kadkadua ti dati nga asawa na ti kallabes ken addaan iti bisyo.
