LAOAG CITY – Insumitir ti National Bureau of Investigation iti Office of the Ombudsman ti nagbalin a resulta ti imbestigasionda mainaig iti maipagarup a ‘misdeclarations’ wenno saan a naideklerar a sanikua iti Statement of Assets, Liabilities, and Net Worth ni Vice President Sara Duterte.
Kinumpirmaran daytoy ni National Bureau of Investigation Director Atty. Melvin Matibag ti panag-turnover ti imbestigasion iti Ombudsman.
Nakita ti kinahon nga ebidensia a bagkat dagiti ‘NBI Agents’ iti maibagbaga a ‘misdeclared’ a sanikua ti Bise Presidente iti Statement of Assets, Liabilities, and Net Worth-na (SALN).
Nupay kasta, addan iti Office of the Ombudsman ti hurisdiksion para iti pannakaituloy ti imbestigasion iti nadakamat a kaso.
Segun ken ni Matibag, napinpintas no ti Ombudsman ti mangisyu ti ‘subpoena’ ken saan nga isudan no ur-urayen laeng ti Bise Presidente a maawagan daytoy.
Kunana pay nga adda pakaseknan ti naipasa a ‘referral’ partikular iti naideklarar nga ‘agricultural land’ ni Duterte a kunana nga adda pay helipad-na.
Daytoy ket basar iti nagbalin nga imbestigasion ti opisina nga rumrumuar nga adda ‘undeclared properties’ ni Vice President Sara Duterte iti Statement of Assets, Liabilities, and Net Worth-na.
