LAOAG CITY – Natay ti kinalubbon ti nakamotorsiklo kalpasan a nadesgrasia iti Brgy. 49-A Darayday ditoy siudad ti Laoag.
Ti nangiturong ti motorsiklo Suzuki Raider 150 ket agtawen ti 18, estudiante idinto a ti biktima a kinalubbonna ket agtawen ti 19, estudiante nga agpada dagitoy a residente ti Brgy. Boyboy iti ili ti Piddig.
Basar iti Laoag City Police Station, kabayatan a dumaldalyasat ti nakamotorsiklo nga agturong nga agpa-amianan ket idi nakadanon iti paset a saan a sementado a kalsada ket napukawan ti kontrol ti maniblea a nangitunda ti pannakadesgrasiada.
Nagsagaba ti sugat iti nagduduma a paset ti bagi dagiti dua a dagus a naitaray iti Governor Roque Ablan Sr. Memorial Hospital ngem naideklara a dead-on-arrival ti kinalubbon ti nangiturong ti motorsiklo babaen ken ni attending physician Dr. Franky Albano.
