LAOAG CITY – Natay ti kinalubbon ti nakamotorsiklo kalpasan ti panagdinnungparda iti maysa a kotse iti Brgy. 45 Tangid ditoy siudad ti Laoag.
Nabigbig ti driver ti Suzuki Raider, Model 2024 nga agtawen iti 23 ken residente ti Brgy. 28, San Bernabe ditoy siudad ti Laoag, Ilocos Norte ken ti kinalubbonna nga agtawen iti 32 ken residente ti Brgy. 7-B Nra Sra De Natividad ditoy siudad ti Laoag.
Nabigbig met ti nangiturong ti kotse a Toyota Vios nga agtawen iti 25 ken residente ti Brgy. 1 Sta. Rita iti ili ti Bacarra ken adda ti maysa a kaduana a nakalugan.
Basar iti imbestigasion, dimmalyasat ti nakamotorsiklo nga agpa-amianan idinto nga agpa-abagatan met ti nangiturong ti kotse no sadinno nga apaman a nakadanonda iti kurbaan a paset ti kalsada ket immagaw ti linya iti kalsada ti motorsiklo a nangitunda ti panagdinnungparda iti kotse.
Gapu iti daytoy, dagus a naitaray iti Governor Roque Ablan Sr. Memorial Hospital ti driver ti motorsiklo ken ti kinalubbonna idinto a saan met a naan-ano dagiti nakalugan iti kotse.
Nupay kasta, naideklara a dead on arrival ti kinalubbon ti nakamotorsiklo babaen iti Attending Physician a ni Dr. Randy Coloma.
Kabayatanna, naammoan a nakasuot ti protective helmet ti driver ti motorsiklo ken ti kinalubbonna idi napasamak ti desgrasia.
