LAOAG CITY – Inbatad ni Mr. Denver Dela Cruz, ti Presidente ti Sanghera iti San Marcelino iti ili ti Dingras ken agdama a Rice Coordinator ti Regional Agricultural and Fishery Council a nagtalinaed a ti kinangina ti farm inputs ti maidandanun kenkuana a problema dagiti pada na a mannalon iti nasao nga ili.
Daytoy ket iti baet nga adda ti ipapaay a tulong ti lokal a gobierno iti ili ti Dingras kadagiti mannalon iti ili ti Dingras.
Segun ken ni dela Cruz, karaman kadagiti kangrunaan nga inbunong ti gobierno lokal iti ili ti Dingras kadakuada a mannalon ket ti abono.
Nupay kasta, kuna ni dela Cruz a saan a makaumanay daytoy a pagabono da kadagiti mula da a pagay no di ket napya laeng nga adda ti pangnayun da kadagiti us-usaren da ken nakissayan ti paggastosan da.
Innayon na a ti nainot da iti panaggatang ti abono ket usaren da laengen a pagtandan iti agraep wenno pagpatractor da.
Inpakaammo ni dela Cruz a kadagitoy a gundaway ket arigna nagtalinaed met ti presyo ti abono.
Mainaig iti daytoy, kuna na a naragsak da gapu ta nangina ti presyo ti irik iti agdama, no sadinno a ti nabilagen ket P30 a pisos iti kada kilo idinto a ti saan pay a nabilag ket P21 a pisos iti kada kilo, ngem ti laeng problema ket bassit pay ti nagapit kadagiti mannalon.
Mangnamnama ni dela Cruz nga agtalinaed a nangina ti presyo ti irik ditoy probinsya kalpasan ti 1st cropping gapu ta kadagiti kabangibang a probinsya ket awan pay ti nakaraep, kayatna a sawen ket dagiti paylaeng mannalon iti llocos Norte ti madama nga agap-apit.
Kabayatanna, kalikagom ni dela Cruz nga agtultuloy koma ti panaggatang ti National Food Authority kadagiti maapit nga irik dagiti mannalon, saan laeng a buffer stock no di ket unlimited stock tapno agtalinaed met a nangina ti presyo ti irik.
