LAOAG CITY – Naipakita iti kinasagana ti nagduduma nga ahensiya iti gobierno lokal ditoy ciudad ti Laoag no adda dagiti mapasamak a gingined ken uram ditoy ciudad.
Daytoy ti inbatad ni Dr. Melvin Manuel, ti mangidadaulo iti City Disaster Risk Reduction and Management Office kabayatan iti naiwayat a simultaneous earthquake drill.
Kunana a daytoy nga aktibidad ket naiwayat iti Laoag City General Hospital a nakipagpasetan dagiti empleyado ti nasao a balay pagagasan, Bureau of Fire Protection, Philippine National Police, Philippine Coastguard ken dadduma pay a rescue groups.
Segun kenni Manuel, babaen iti nasao nga aktibidad ket naipakita dagiti mabalin a mapasamak nu adda didigra kas iti gingined ken uram a rumbeng nga respondean nga insigida dagiti otoridad.
Inbatad na a kadagitoy a panawen, aglalo iti panagpasar ti nangato nga heat index ditoy ciudad ket narisgo ken mabalin a mangitunda ti kalamidad isut gapuna a rumbeng a maipalagip kadagiti otoridad ken dagiti tattao ti rumbeng nga aramiden.
Kabayatanna, nagyaman ni Manuel gapo ta nagballigi ti nasao nga aktibidad ken nakita ti napintas a koordinasion ken alisto a panagresponde dagiti otoridad.
