LAOAG CITY – Nagpadispensar ti maysa a fire crew volunteer manipud Pennsylvania gapu iti panangipalubosda iti Halloween float a mangiladawan ken ni United States Vice Pres. Kamala Harris a nakakawar a makipaset iti tinawen a paradada iti Halloween.
Makita kadagiti video ken ladawan iti online ti maysa a lugan a naarkosan kadagiti karatula ti kampania ni dati a US Pres. Donald Trump a minaneho dagiti tattao a nakabado kas ahente ti Secret Service, idinto a nakabado met a kas iti bise-presidente ti naigalut bayat a magmagna.
Gapu iti daytoy, ibilang dagiti supporters ni Harris kas maysa a racist nga addaan kadagiti pangidasig kadagiti ladawan manipud kadagiti panawen ti pannakaadipen ken saan a patas a panagbiag iti Estados Unidos.
Inpablaak met ti local mayor ti nasao a lugar a ni Diane Bailey ti pakaseknan na gapu ta ti imahe a nai-portray ket maysa a nakabutbuteng ken makapasakit ti nakemna.
Kabayatanna, nagkiddaw metten ti dispensar ti Mount Pleasant Volunteer Fire Department gapu ta inpalubos da ti kastoy a costume kabayatan Halloween parade.
