LAOAG CITY – Naragsak ken emosyunal ti rikna ti maysa a nakanggeg iti mensahe ni Pope Francis kadagiti Pilipino kabayatan ti nasantoan a misa kas paset ti selebrasyon ti maika-500 nga anibersayo ti kristianismo iti Pilipinas.
Daytoy ti inpasingked ni Bombo International News Correspondent Ms. Flordeliza Sales idiay Rome, Italy ken maysa a miembro ti Sentro Pilipino Chaplaincy Council babaen Worship Commission.
Kuna ni Flordeliza a kabayatan ti sermon ti Santo Papa, inpeksa na ti panangdayaw na iti kinatured dagiti Pilipino.
Inbatad na a segun iti Santo Papa, ibilang na a misyonaryo dagiti Pilipino gapu iti kinatured dagitoy a nangserrek iti Italya kangrunaan dagiti nagduduma a pamilya a pagserserbian da.
Innayun ni Sales a kangrunaan a nagyamanan ti santo papa ket ti pudno a panagserbi dagiti Pilipino.
Ituloy ti pammati iti kristianismo ta daytoy ti mangit-ited ti tured kadagiti Pilipino nga agpapaay saan laeng nga iti Italya nu di ket iti intero a lubong.
Mainaig iti daytoy, inbunannag ni Sales a maysa kadagiti nainbuklan nga inbalikas ti Santo Papa kabayatan ti misa ket ti panangdayaw na iti nairot a pammati dagiti Pilipino iti Diyos.
Inbatad na daytoy ti kuna ti Santo Papa tapno mapagtalinaed ti ragsak ken namnama kadagiti Pilipino iti baet ti mapaspasaran a pandemiya.
Kabayatanna, inpakaamo ni Sales a kadagiti naglabas a tawen ket agarup 7,000 a Pilipino dagiti makiselebrar iti nasao a selebrasyon ngem gapu it pandemiya ket nalimitaran laeng.
Inbatad met ni Fr. Erickson Josue, maysa a miembro ti Roman Catholic Diocese of Laoag ngem agdama nga agad-adal ti post graduate idiay Rome, Italy a naragsak ti pannakaselebrar ti maika-500 a selebrasyon ti kristianismo iti Pilipinas.
Kuna na a daytoy ket gapu ta naiget ti panangdaydayaw ti Santo Papa kadagiti Pilipino.
Mainaig iti daytoy, inbatad na a malaksid iti pammadayaw ti Santo Papa, kangrunaan a sentro ti selebrasyon ket ti pannakabigbig ti nairot a pammati dagiti Pilipino.
Kuna na a ti panangparay-ray ti pammati ti karit ti nasao a selebrasyon.
Inbatad na a daytoy ket tapno maipalagip kadagiti amin a Pilipino nga uray aniaman ti mapasamak wenno sangwena didigra, krisis ken dadduma pay a problema ket mapagtalinaed a natibker ti pakinakem ken pammati dagiti Pilipino.