LAOAG CITY – Ilunglungalong ti Presidential Task Force on Media Security nga ibilang kadagiti maikonsiderar nga election offense dagiti panag-harass kadagiti kameng ti media iti pagilian.
Inrakurak daytoy ni Presidential Task Force on Media Security Executive Director ken Usec. Paul Gutierrez sakbay ti panagpirma na iti Memorandum of Agreement kadwa na ti Commission on Elections iti sumaruno a bolan mainaig paylaeng iti maiyuswat nga eleksyon intono 2025.
Kuna na a saan a linged kadakuada ken ni Commission on Elections Chairman Garcia dagiti pangta iti biag dagiti kameng ti media iti pagilian kangrunaa na tunggal panawen iti eleksyon.
Mainaig iti daytoy, inrakurak ni Gutierrez nga adda ti diaya ti komisyon nga usaren ti bilegna a mangballaag kadagiti kandidato, Political parties, ken dagiti supporters da nga aniaman a klase ken gandat a panagharass kadagiti kameng ti media ket adda ti kaibatugan na a maiyannatop a pannusa.
Inlawlawag ni Gutierrez a ti nasao a katulagan a pirmaan da iti Commission on Elections ket saanna a gagem nga amendaran ti Omnibus Election Code, ngem ketdi silulukat iti kastoy nga ideya.
Ti nagduduma ti klase na a kinadamsak kontra kadagiti kameng ti media ket saan a maikonsiderar nga election offense iti babaen ti Omnibus Election Code, ngem ikonkonsiderar paylaeng ti nasao a linteg dagiti panagpangta, intimidation, ken panagusar ti fraudulent devices of scheme, ken dadduma pay kontra iti maysa a tao wenno botante iti kangitingitan ti eleksyon kas election offense.
