LAOAG CITY – Inbatad ni Mr. Arthur Mabanag iti Barangay Ester iti ili ti Vintar a napalalo ti kigtot da iti asawa na kalpasan a nakita da ti maysa a King Cobra nga adda iti arubayan da.
Inlawlawag na a kabayatan ti panagin-inana da iti asawa na ket nadlaw da nga arigna adda ti kabuteng ti manok da iti sango ti balay da.
Kuna na nga iti papanna panangkita ket nakigtot idi nakita na a maysa a king cobra ti kabuteng ti manok da.
Segun kenkuana, ammo na no kasanu ti karisgo ti king cobra isut gapuna a napan nangala ti pinangpang-or na.
Innayon na nga idi napasaktan na ti king cobra ket ginandat na a darupen daytoy no sadinno nga immatiddog pay ti tengnged ken timmakder ti ulo na isut gapuna a nagtaray.
Iti panagtaray ni Mabanag ket isu metten ti panagpuligos ti king cobra ken kimmamang iti kasamekan kalpasan na ket napan iti comfort room (CR) ti karruba da rason nga inayaban na ti abalayan ken kaanakan na tapno pagtitinnulungan da a kutkuten kalpasan a napan iti abot.
Nupay kasta, narigatan da a nangkutkut ti daga rason a naginana da paylaeng ken kalpasan ti 30 a minutos ket sinublianan da ti lugar no sadinno a ditoyen a nasukit na ti ipos na a nangitunda ti pannakaripot ken pannakapatay da.
Inpakaammo ni Mabanag a ti napatay da a king cobra ket agatiddog ti uppat a kadapan ken tallo a pulgada.
Innayon na a daytoy paylaeng ti kaunaan a gundaway a nakakita ken nakapatay da ti king cobra iti nadakamat a lugar.
