LAOAG CITY – Manamnama ti imbestigasion ti Senado kadagiti kaso ti sexual abuse ken human-trafficking ni Pastor Apollo Quiboloy ken dadduma pay a kameng ti Kingdom of Jesus Christ (KOJC) inton Oktubre 23, 2024.
Segun kenni Senate Committee on Women, Children, Family Relations and Gender Equality Chairperson Risa Hontiveros, nasurok a kagudua a tawen ti napalabas sakbay a naituloy ti komite ti imbestigasion kadagiti kaso ti panangabuso iti Kingdom of Jesus Christ leader kalpasan a naglemmeng dayroy kadagiti otoridad iti sumagmamano a bulan.
Kinunana nga agsurat ti komite iti korte tapno agkiddaw iti pammalubos a sumango ni Quiboloy iti Senate hearing.
Manamnama pay nga agparang iti hearing ti sumagmamano kadagiti resource persons a biktima ni Quiboloy ken adda dagiti baro a witness tapno laeng makagun-odda ti sangkabassit nga hustisia.
Innayon ni Hontiveros nga adda dagiti indibidual nga immasideg iti opisinana ken iti komite a nangipeksa a kalikagomda nga agparang iti hearing ni Quiboloy tapno ibutaktak da dagiti saab a maiparbeng nga inaramid ti Kingdom of Jesus Christ leader kadakuada.
