LAOAG CITY – Nakanselar ti klase ti amin a level kadagiti pampubliko ken pribado a pagadalan iti ili ti Pagudpud.
Segun ken ni Mr. Hendrick Pedronan, ti Municipal Disaster Risk Reduction Management Officer iti nasao nga ili, daytoy ket kalpasan ti pammilin ni Mayor Rafael Benemerito gapu iti naiparuk-at a tsunami warning ti Philippine Institute of Volcanology and Seismology ditoy Ilocos Norte.
Inbatadna a nangiyatnag ti alarm system ti lokal a gobierno kas pakalasinan nga agbalin a naridam dagiti amin nga umili.
Kunana a dagus a nagturong ti grupo ti Municipal Disaster Risk Reduction Management Office kadagiti kabaybayan tapno kitaen ti agdama a situasion no sadino naigetda nga inpatungpal ti “No Fishing” ken “No Swimming” Policy.
Inlawlawagna a nangiruar met ti Emergency Operations Center ti ballaag kadagiti amin a barangay iti ili ti Pagudpud tapno mapakaammoanda iti mapaspasamak iti aglawlaw.
Mainaig iti daytoy, kuna ni Mr. Pedronan nga adda dagiti sumagmamano a residente a saanen a nagtuloy a napan nag-picnic pakairamanan dagiti mangngalap gapu iti nasao a pakdaar.
Innayonna a nakasagana metten dagiti amin nga Evacuation Center iti ili ti Pagudpud no bilang sumangbay ti didigra.
Immuna iti daytoy, nangiparuk-at ti Philippine Institute of Volcanology and Seismology ti tsunami warning gapu iti idadayyeg ti 7.5 magnitude a ginggined idiay Taiwan ngem kinanselar met laeng ti nasao nga ahensia ti tsunami warning iti intero a pagilian a Pilipinas.
