LAOAG CITY – Nagrugin a nagbalin nga aktibo manen ti Klyuchevskoy volcano iti Kamchatka peninsula kalpasan iti idadayyeg ti magnitude 8.8 a gingined idiay Russia.
Basar iti Russian Academy of Sciences’ United Geophysical Service, nagbuga ti abo ken lava ti nasao a bulkan sumagmamano nga oras kalpasan ti gingined.
Masarakan ti bulkan iti 450 a kilometro ti amianan a paset ti Petropavlovsk-Kamchatsky.
Ti Klyuchevskoy volcano ket maysa kadagiti kangatoan a bulkan iti intero a lubong.
Maipalagip a narikna ti magnitude 8.8 a gingined iti Kamchatka region a nangitunda iti pannakadadael ti adu a pasdek ken pannakasugat dagiti residente idinto nga awan ti nairekord a natay.
Kabayatanna, gapu iti kinapigsa ti gingined ket naiyetnag ti tsumani warning kadagiti nagduduma a pagilian.
