LAOAG CITY – Nairekomendar ti pannakai-lockdown ti kumpanya a pagtrab-trabahoan dagiti dua nga Authorized Persons Outside Residence (APOR) a nagpositibo ti covid-19 ditoy probinsya.
Inlawlawag ni Major Roxanne Parado, ti mangidadaulo iti Emergency Operation Center for Covid-19 Contact Tracing, a basar iti operational guidelines ti national task force ken ti executiver order ni Governor Matthew Marcos-Manotoc, masapol a maipan iti lockdown ti maysa a kompanya no addan ti dua nga agpositibo ti virus.
Inbaga ni Parado a no mabalin ket mailockdown ti nasao a kompanya uray tallo laeng nga aldaw para iti pannakaisayangkat ti disinfection.
Kabayatanna, inbatad ni Doctor Norman Rabago, ti Provincial Covid Consultant nga agtataripnong da tapno pagsasaritaan da no ania ti napintas nga aramiden da para iti daytoy.
Innayon na a no saan a sumurot ti kompanya iti maipatpatungpal a pagalagadan ket agsungbat da iti linteg.
Saan metten a nadakamat pay da Rabago ken Parado no ania a kompanya ti dakdakamaten da a masapol a mailockdown pay laeng.
