LAOAG CITY – Mapatawan ti multa a 5 ribo a pisos ti kada waya dagiti telecommunication company nga aglabsing iti Anti-Spaghetti Wires Ordinance ditoy probinsya.
Daytoy ti inbatad ni Sang panlalawigan member Hanson Chua, chairman ti Committee on Trade and Industry ditoy probinsya.
Segun ken ni Chua, maikkan ti 10 nga aldaw dagiti nasao a kompanya kalpasan a maawat da ti memorandum a kasapulan a plastaren da dagiti waya da.
Inpetteng na nga awanen ti maipaay a 1st agingga iti 3rd offence tapno al-alisto ti panangdalos ken panangiplastar dagiti nasao a kompanya kadagiti waya da a saanen a kasapulan ken nababa unay a mabalin a pakaitundaan ti disgrasya.
Mainaig iti daytoy, inpakaammo ni Chua a malaksid iti gobierno probinsyal ket kalikagom met dagiti lokal a gobierno ti mangbukel ti bukod da a technical working group tapno isuda a mismo ti mangibaga no sadinno ti lugar ti maiprayoridad a madalusan manipod kadagiti makunkuna nga spaghetti wires.
Mamati ni Chua a babaen iti daytoy ket in-inot a maragpat ti underground cabling basta adda ti panagtitinnulong ti amin.
