LAOAG CITY – Manamnama a dumalan iti inquest proceeding ti subject ti naiyuswat a drug buy-bust operation iti Brgy.7-A Nuestra Seniora Natividad ditoy ciudad ti Laoag.
Nabigbig daytoy a ni Jay Mar Bumatay, a.k.a LAKI, agtawen ti 33, naasawaan, bus conductor, ken residente iti Brgy. Aring, Badoc, Ilocos Norte.
Segun iti Provincial Drug Enforcement Unit iti Ilocos Norte Police Provincial Office, ni BUmatay ket maibilang a Top 10 Regional High Value Individual iti Police Regional Office 1.
Iti naisayangkat nga operasyon, rumrumuar a naglako ni Bumatay iti police poseur buyer ti maipagarop a maysa a sachet a naglaon ti maatap a shabu.
Nakumpiskar pay dagiti otoridad ti walo a sachet ti maatap met laeng a shabu nga agdagsen amin dagitoy ti 3.5 grams ken agbalor ti 23,800 a pisos, maysa a 1,000.00 bill a nagserbi kas buy-bust money, walo nga open transparent plastic sachets, maysa a brown paper, maysa a colored black wallet ken maysa a cellphone ken ti personal a kwarta na a 1,920 a pisos.
Iti agdama, ni Bumatay ket nagtalinaed iti kustudiyar ti Philippine National Police ditoy ciudad ti Laoag ken maisagsaganan ti kaso a panaglabsing iti Republic Act 9165.
