LAOAG CITY – Im-imbestigaren ti Philippine National Police ti damag a maipagarup nga adda ti koneksion ni Bamban, Tarlac Mayor Alice Guo iti Chinese Communist Party.
Segun ken ni Philippine National Police Chief Gen. Rommel Francisco Marbil, inbilinnan ti Criminal Investigation and Detection Group ken ti Intelligence Group a tingitingenda a naimbag ti impormasion nga adda ti pakainaigan ni Guo iti Chinese Communist Party.
Rimmuar iti maysa a bidyu a naiparuk-at iti online a maysa a dakkel a pamilia ti Guo a manipod iti Fujian ken nagwaras iti intero nga Asya.
Rumrummuar a ti Fujian ket lugar dagiti komunista.
Inbatad ni Marbil nga amin nga impormasion a maaw-awatda ket napagtitipon tapno masigurado nga husto ti imbestigasionda.
Karaman ni Guo iti operasion ti Philippine offshore gaming operator hub iti Bamban a rinespondean dagiti operatiba gapu kadagiti nagduduma nga illegal activities.
Kuna ni Marbil, masapol a konkreto ti iggemda nga ebidensia ken imbestigasion gapu ta maysa a public official ti karaman iti daytoy.
Innayonna a dagusda nga irakurak ti resulta ti imbestigasion ken ni Guo.
