LAOAG CITY – Binaliktad ti kongreso idiay Brazil ti nai-veto a gakat para iti pannakaipababa ti sentensya ni dati a President Jair Bolsonaro iti pagbaludan gapu iti panagplano na ti kudeta kalpasan a naabak iti eleksyon.
Maipalagip nga iti napalabas a tawen ket nasentensyaan ni Bolsonaro a mabalud ti 27 a tawen gapu iti pananggandat na ti kudeta kalpasan a naabak iti 2022 elections babaen ken ni Luiz Inacio Lula da Silva.
Ginandat ni Lula a lapdan ti addang ti kongreso ngem iti maysa a nabara a session ket pinaawan bileg dagiti agpanpanday linteg ti nasao a linteg a mangbaliw ti maipataw a sentensya.
Maipalagip a napalubusan ni Bolsonaro, agtawen ti 71, a temporaryo a maikabil iti babaen ti house arrest gapu iti sagsagabaen na a sakit.
Ni Bolsonaro ket nagserbi iti maysa a termino kas presidente ti Brazil manipod idi 2019 agingga it 2022.
