LAOAG CITY – Kalikagum ni Sangguniang Panlungsod Member Bryan Alcid a mangputar ti ordinansa a mangipangpangruna kadagiti negosiante a Laoageño nga agpwesto iti SM ditoy siudad ti Laoag.
Daytoy ket kalpasan a naidasar iti konseho a maiprioridad dagiti residente ditoy siudad a maipaayan ti panggedan.
Inlawlawag ni Konsehal Alcid a maikkan ti importansia dagiti business owners nga agpuesto iti maar-aramid a dakkel a mall.
Kunana a nasken laeng a maipangpangruna dagiti taga ditoy siudad ti Laoag tapno maalay-ayan ti pamastrekan dagiti maseknan a residente.
Innayonna nga ikarigatanna nga aramiden ti ordinansa iti kabiitan a panawen tapno dagusna nga idasar daytoy iti Sangguniang Panlungsod.
