LAOAG CITY – Kalikagum ni Sangguniang Panlungsod Member James Bryan Alcid, Chairman ti Committee on Infrastructure nga adda ti maiyestablisar nga underpass iti Brgy. Sta. Maria ditoy siudad ti Laoag.
Segun kenkuana, basar iti obserbasionna ket saan a napintas ti pannakaiplastar ti nasao a kalsada gapu ta adda ti posibilidadna nga agdidinnungpar dagiti lugan a dumalyasat.
Inbatadna a daytoy ket kalpasan a nababa ti kalsada ken saan a dagus a makita dagiti kasinnabat a lugan ken kurbaan daytoy.
Kunana a dumanon iti walo a ribu a residente ti maapektaran ken mabenepisiaran no agtungpal ti gagemna a proyekto.
Innayonna a nakikoordinar daytoyen iti Department of Public Works and Highways – First District Engineering Office maipanggep iti nasao a plano tapno maadal a naimbag sakbay a naan-anay a maipatungpal.
