LAOAG CITY – Saan nga ilibak ni Konsehal Allan Coloma, agdama nga acting mayor ti Marcos Ilocos Norte nga agkarkarawa ti kellaat a pannakaited kenkuana ti posisyon nga acting mayor.
Kuna na nga adu pay dagiti nasken nga adalen na kalpasan a naited kenkuana ti nasao a posisyon.
Segun kenni Coloma, saan na a namnamaen a maited kenkuana ti posisyon gapu ta maikadua a konsehal.
Inbatad na nga awan ti mabalinan na gapu ta naitudingen nga acting mayor rason nga aramiden na ti kabaelan na nga aserbi ti ili a Marcos.
Maipalagip a nadismiss ti maikadua nga acting mayor ti Marcos a ni dati a konsehal Rofel Pambid gapu ti kaso na idinto a ni Mayor Jessie Ermitanio ket nagtalinaed iti kustudyar dagiti otoridad kalpasan a natiliw ken naitudo a mastermind ti pannakapapatay ni dati a Mayor Arsenio Agustin.
Ni Coloma ti maikatlo nga agserbi kas acting mayor idinto nga immuna ni Ermitanio kalpasan a pimmusay ni Agustin.
