LAOAG CITY – Kiniddaw ni Sangguniang Panlungsod Member Jaybee Baquiran a saan koma a pagbaybayaden dagiti umili a mapan agpatudok iti anti-rabies vaccine iti City Health Office ditoy siudad ti Laoag.
Daytoy ket kalpasan a maipagarup nga adda dagiti report nga agbaybayad dagiti sumagmamano nga umili para anti-rabies vaccine.
Segun ken ni Konsehal Baquiran, adda ti nailatang a pundo a paggatang iti anti-rabies vaccine tapno maipaay daytoy a libre kadagiti agkasapulan kadagitoy.
Kabayatanna, inlawlawag ni Dr. Rodrigo Catcatan, City Health Officer ditoy siudad ti Laoag nga inabisoanda dagiti umili iti temporario a panaggatang iti anti-rabies vaccine gapu ta ti 50 vials a nai-deliver kadakauada iti bulan ti Enero ket naibosen.
Nupay kasta, inpasingked ni Catcatan a manamnama a mai-deliver dagiti nayon pay nga anti-rabies vaccine kadagitoy a sumarsaruno nga aldaw tapno saan a marigatan dagiti umili.
