LAOAG CITY – Maalarma ni Sanggunian Panglusod Member Bjorn Lao iti agdama a sitwasion iti Gabu Watch Tower ditoy ciudad ti Laoag.
Daytoy ket kalpasan iti ibibisitana iti nasao lugar no sadinno a nakitana nga arigna maperperdi daytoyen.
Inbata na a gapu kadagiti nagsasaruno a didigra dimmuparak ditoy probinsia ket ad-adda nga immado dagiti perdisyon ti Gabu Watch Tower isut gapuna a no mabalin ket matarimaan a dagus tapno saan a naan-anay a madadael.
Mainig iti daytoy, inpakaammo ni Lao nga adda ti budget na daytoy ngem kasapolan paylaeng nga adda ti pammalubos ti National Historical Commission of the Philippines sakbay sakbay a garawen ken tarimaanen.
Kabayatanna, kuna ni Presiding Officer/Vice Mayor Rey Carlos Farinas nga addan iti immuna a panagidanon na iti Head ti National Conservation Commission mainaig iti daytoy a banag ngem agpapan ita ket iyur-uray da paylaeng ti sungbat da.
Innayon na a no saan da a maiyuray ti pammalubos ti National Conservation Commission ket mangaramid da ti resolusyon tapno ipaganetget ti kinapateg ti Gabu Watch Tower ditoy ciudad ti Laoag.
