LAOAG CITY – Kalikagom ni Konsehal Bryan Alcid a matarimaan ti Small Water Impounding Project (SWIP) iti Brgy. Bacsil-north ditoy ciudad ti Laoag.
Inbatad ni Alcid a naamoan na iti ibibisita na iti Brgy. San Mateo ditoy ciudad ti Laoag nga adda ti naabandonar a dam iti lugar, addan 30 a tawen ti napalabas.
Inpakaammo ni Alcid a nagturong payen iti National Irrigation Administration ngem naamoan na nga ado dagiti kasapulan a proseso no matarimaan ti naabandonar a dam.
Kuna na a kalikagom da a maiyalisto daytoy a proyekto ket mainayun ti pondo iti 2024 Project Proposal ti Department of Public Works and Highways (DPWH) ti umuna a distrito ditoy probinsya.
Kabayatanna, inrakurak ni Konsehal Derek Lao a nabayagen a maikidkiddawan ti pondo ti pannakatarimaan ti nasao a dam ngem saan a naaprubaran.
Innayon na nga idi 2009 ket 14 a milyon a pisos ti kiddaw da a pondo ti Department of Agriculture para ti pannakatarimaan ti dam gapu ta ado dagiti barangay a mabenepisyaran na.
Karaman a masuplayan ti danom manipod iti dam ket ti Brgy. Bacsil-North, Bacsil-South, Brgy. Lataag, ken iti Brgy. San Mateo ditoy ciudad ti Laoag.
