LAOAG CITY – Pabor ni Sangguniang Panlungsod Member John Michael Fariñas, ti Chairman iti Committee on Education ditoy siudad ti Laoag ti panangilungalong ti Kamara de Representantes ti pannakaipaay ti scholarship kadagiti persons with disabilities.
Segun kenkuana, napintas daytoy nga addang dagiti agpanpanday linteg tapno matulungan dagiti indibidual nga adda ti rangkap ti bagida.
Inbatadna a maysa kadagiti rason no apay saan a makaadal dagiti maseknan a persons with disabilities ket gapu iti problema ti pinansial, abilidad ken dadduma pay.
Inlawlawagna a babaen iti daytoy ket ad-adda a maikkan ti oportunidad dagitoy a makaadal agingga a makaturpos ken saan nga agbalin a lapped ti kasasaadda tapno agsardeng ti panagbasada.
Innayonna a mangkita daytoy ti wagas tapno mangipasa ti maysa a resolusion tapno mangipakita ti suporta iti mailunglungalong a gakat iti Kamara de Representantes.
Immuna iti daytoy, kiniddaw ni CIBAC party-list Representative Eddie Villanueva iti babaen ti House Bill 10078 wenno ti Scholarship Grants for PWDs Act of 2024 a mangimandar iti Department of Education (DepEd) ken Commission on Higher Education (CHED) iti pannakikammayetda iti Department of Social Welfare and Development (DSWD) nga ikkan ti scholarship grants dagiti persons with disabilities nga agtawen ti 25 agpababa.
