LAOAG CITY – Kalikagum ni konsehal Handy Lao a makaatendar iti Sinulog Festival idiay Cebu City ita a tawen.
Daytoy ti inpakaammo na kadagiti miembro iti 12th Sanggunian iti naiyuswat a regular session da.
Inpalgak ni Lao a babaen iti daytoy ket maimatangan konseho iti ciudad no kasano nga agisagana dagiti government officials iti Cebu iti Festival da.
Kunana a idi naminsan a nakita na ti proseso iti panagsagana da kadagiti programa ken aktibidad da para iti nasao a festival ket maragsakan.
Gapo iti daytoy, namnamaen ni Lao a makaatendar met dagiti dadduma a miembro ti konseho gapo ta mamati nga ado dagiti mabalin a maala nga ideya a maiyaplikar para iti panagselebrar met ti Pamulinawen Festival 2023 iti ciudad ti Laoag.
Inpakaammo ti Konsehal a manarimaanen ti koordinasyon da kadagiti opisyales iti Cebu City ken adda iti manamnama a sumangpet nga imbitasyon ita nga aldaw Enero 13 agingga intono Enero 16 a maisumitir met iti Mayor’s Office ken Vice Mayor’s Office para iti panakaaprobar na.
